Փողոցում կա մի խմբակ, որն ագրեսիվ է տրամադրված այլ կարծիք ունեցող քաղաքացու նկատմամբ. Ծովինար Վարդանյան

մայիսի 21, 2022

Հարցազրույց ԱԺ «Քաղաքացիական պայմանագիր» խմբակցության պատգամավոր Ծովինար Վարդանյանի հետ: 

-Խորհրդարանական ընդդիմությունը փողոցում պահանջում է Նիկոլ Փաշինյանի հրաժարականը: Նրանք Արցախի փրկության կոչերով են հանդես գալիս, իսկ իշխող թիմի ներկայացուցիչները ընդդիմության գործողություններն անվանում են խուլիգանություն: Մինչդեռ այսօր էլ օգտագործվում է նույն 2018-ի գործիքակազմը։ Ո՞րն է տարբերությունը: 

–Ես նույնիսկ չէի համեմատի այդ երկու գործընթացները, որովհետև 2018-ին համազգային շարժում էր, իսկ այսօր խոհրդարանական ընդդիմությունը դուրս է եկել փողոց՝ շուրջը բոլորելով իր աջակիցների մի մասին: Իսկ խուլիգանություն կոչում են, որովհետև շարժման գործընթացում տեղի ունեցող իրադարձություններն արդեն իսկ խուլիգանություններ են: Բնականաբար, մարդիկ դա տեսնում և արձագանքում են: 

–Դրանք քաղաքական ակցիաներին բնորոշ քայլեր չե՞ն:

–Ոչ, որովհետև, օրինակ, հանրային և ոչ հանրային մարդկանց այլակարծության համար սպառնալը, անվանարկելը քաղաքական գործիքակազմ չեն: Դրանք օրենքով են արգելված:

–Օրեր են լինում, որ բերման ենթարկվածներն ավելի շատ են լինում, քան 2018-ին: Սա ինչի՞ հետևանք է. օրինախախտումների՞, թե՞ ոստիկանության ոչ համաչափ գործողությունների:

–Հարցն այն չէ, թե քանի հոգի է բերման ենթարկվել: Կարծում եմ՝ ոստիկանությունը լիազորությունների շրջանակում իրականացնում է իր պարտականությունները: Նորից եմ ասում՝ ես չէի համեմատի, որովհետև ոստիկանությունը դեռ բարեփոխումների օրակարգի մեջ է, և ակնհայտ է տարբերությունը ոստիկանական ուժերի երեկվա և այսօրվա գործողությունների միջև: 

Կարծում եմ՝ մեր ոստիկանները բավական համաչափ են արձագանքում իրադարձություններին: Այսօր փողոցում կա մի խմբակ, որը բավական ագրեսիվ է տրամադրված այլ կարծիք ունեցողի նկատմամբ, և ոստիկանները պարտավոր են բացի քաղաքացիների մի մասի ազատ հավաքների իրավունքը ապահովելուց, ապահովել նաև մյուս քաղաքացիների անվտանգությունը: Մենք տեսնում ենք, որ այդ խմբակը մարդկանց անվտանգության հետ կապված խնդիրներ է առաջացնում։

–2018-ին, երբ ընդդիմության պատգամավորների մի մասը փողոցներում էր՝ Նիկոլ Փաշինյանի գլխավորությամբ, ԱԺ նախագահը և իշխող ուժի պատգամավորները չէին մտծում ընդդիմադիր պատգամավորներին մանդատից զրկելու մասին: Հիմա ինչո՞ւ է իշխանությունը խուճապահար փորձում զրկել ընդդիմադիրներին մանդատներից: 

–Իշխանությունը խուճապի մատնված չէ: ԱԺ նախագահի պարտականությունն է խստագույնս հետևել Ազգային ժողովի աշխատանքներին և պատգամավորների պարտականությունների կատարմանը։ Բացակայությունների հիմքով մանդատից զրկելու հարցը մեր թիմը չի հնարել: Դա օրենքով է սահմանված, և ԱԺ նախագահն իր պարտականություններն է կատարում: Ինչ վերաբերում է հարցի երկրորդ մասին, այստեղ նորից համեմատական եք տանում 2018-ի և այսօրվա գործընթացների միջև, բայց ես ուզում եմ մի բան հստակ արձանագրել. 2018-ին ժողովուրդը պայքարում էր իր իրավունքների, ազատությունների համար, պայքարում էր, որ կարողանա իր ձայնը տեղ հասցնել և իր կամքը արտահայտել, օրինակ, ընտրությունների միջոցով: Այսօր այն, ինչ տեղի է ունենում, օրակարգը, որ ներկայացվում է, լրիվ հակառակից է գալիս։ Պայքարում են, որ ժողովրդի ընտրությունն ու կամքը չեղարկվեն: Այսինքն, թիրախավորվել է ժողովրդավարությունը, և փորձում են սասանել նրա հիմքերը:

–Այսինքն` կե՞ղծ օրակարգ է, երբ ասում են, որ իրենց նպատակը Արցախը փրկելն է, պետք է օր առաջ այս իշխանությունը հրաժարական տա, քանի որ «կապիտուլյանտ է ու հողատու»։ 

–Ես այդ մակարդակի չեմ իջնի, որ նույն բառապաշարով պատասխանեմ այդ մարդկանց։ Նույնիսկ դիմացինին վիրավորելիս՝ մարդն իր մակարդակն է ցույց տալիս: Ինչ վերաբերում է ընդդիմության օրակարգի կեղծ լինել-չլինելուն, իրենք էլ կողմնորոշված չեն՝ հիմա Արցախի փրկության համա՞ր են պայքարում, ո՞րն է այդ գործիքակազմը, որով Երևանի փողոցները փակելով՝ փրկում են Արցախը: 

–Գալու են իշխանության, որ փրկեն: 

–Իշխանության հնարավոր է գալ միայն ընտրությունների միջոցով: 

–Բացառո՞ւմ եք արտահերթ ընտրությունների հնարավորությունը: 

–Այո, բացառում եմ արտահերթ ընտրությունների որևէ գործընթաց, որովհետև ժողովուրդը շուրջ մեկ տարի առաջ է կատարել իր ընտրությունը, և մենք, որպես պետություն, պարտավոր ենք պահպանել ժողովրդի ընտրությունն ու կամքը: 

–Ազգային ժողովում մնացել եք մենակ, հետաքրքի՞ր է խորհրդարանում աշխատանքն առանց ընդդիմադիրների: 

–Եթե անկեղծ լինեմ, նրանց ֆիզիկական ներկայությունն ԱԺ-ում մինչև իրենց փողոց դուրս գալը, բովանդակությամբ բացարձակ չէր լրացնում մեր օրակարգը: Հետևաբար, ոչինչ չի փոխվել, օրակարգը ձևավորում ենք մենք, քննարկումները լինում են այնպես, ինչպես լինում էին նախկինում: Ուղղակի կողքից այսպես հայրենասիրական պոպուլիստական հայտարարություններով հանդես եկողներ չկան: Բայց էդ մարդիկ, չկարողանալով այստեղ բովանդակություն ձևավորել ու դրա շուրջ նաև բանավեճի բռնվել իշխանության հետ, դուրս են եկել փողոց՝ –հիմա էլ մարդկանց նյարդերը քայքայելու: 

–Ընդդիմության առաջնորդները վստահ են իրենց հաղթանակի մեջ և ասում են՝ շատ քիչ ժամանակ է մնացել այս իշխանությանը:

–Դե, իրենք սահմանել էին մի ժամկետ, հետո ժամկետը փոխվեց, հիմա այլ ժամկետ են սահմանել: 

–Վերջին շրջանում շատ են զուգահեռներ տարվում ՔՊ–ի ու ՀՀԿ–ի միջև այսօր իշխող ուժը դարձել է նախորդի նման բրգաձև կառույց, որտեղ որոշումներ կայացնում է մեկ անձը: Դուք կուսակցությունը վերափոխելու խնդիր չունե՞ք: 

–Բնականաբար, այդ տեսակետը չեմ կիսում, որովհետև ես թիմի անդամ եմ և ներսից գիտեմ՝ ինչպես է աշխատում մեր քաղաքական թիմը: 

–Չունե՞ք օդիոզ դեմքեր: 

Ես չեմ կարող ասել։ Ես էլ կարող եմ որևէ մեկի համար լինել ոչ ցանկալի դեմք, բայց դա չի նշանակում, որ կարելի է էլի համեմատական տանել մի ռեժիմի հետ, որը կարելի է ասել, զավթել էր իշխանությունը և բռնի ուժով պահում էր այն: Տեղին չեմ համարում նման զուգահեռները, որովհետև բացարձակ տարբեր ուժերի մասին է խոսքը: 

–Նշում են, որ դուք հեղափոխության արժեքներից, հռչակված նպատակներից ակնհայտորեն շեղվել եք: 

–Ովքե՞ր են նշում նրանք, ովքեր երբեք չեն եղել հեղափոխական արժեքների կրող կամ նախկին իշխանության շուրջն են պտտվում: 

–Չե՞ք ընդունում, որ շատ խոստումներ, այնուամենայնիվ, չեն կատարվել։

–Եթե նկատի ունեք, որ իշխանությունը որոշ տեղերում թերացել է, ապա բնականաբար, ոչ մեկն անթերի չէ: Աշխատող մարդը միշտ էլ ունենում է սխալներ կամ թերացումներ: 

–Զգո՞ւմ եք, որ հանրությունը վերաբերմունքը ձեր թիմի նկատմամբ փոխվել է։

–Մեկ տարի չկա, որ տեղի են ունեցել ընտրություններ, որտեղ արձանագրվել է, թե որքան է վստահում հասարակությունն այս իշխանությանը՝ չնայած բոլոր ճգնաժամերին, արհավիրքներին: Այդ հարցի գնահատականն ամենալավը տվել է ժողովուրդը՝ իր ընտրությամբ: Ես չէ, որ պետք է գնահատեմ:
 

–Վերջին մեկ տարում ոչինչ չի՞ փոխվել: 

–Իսկ ի՞նչ է փոխվել 2021-ի ամառավանից հետո: 

–Ընդդիմությունը տարբեր ակցիաներ է անում, շարժում է սկսել և անխնա քննադատում է իշխանությանը։ 

–Ընդդիմադիր շարժումները կորցրել են հանրային աջակցությունը։ Հայտարարում են, թե սա իրենց վերջին մարտն է, թե իրենք դուրս են եկել հարցեր լուծելու, բայց ակնհայտ է, որ նրանց շուրջը մարդ չի հավաքվում։ 

–Իշխան Սաղաթելյանը հայտարարել է, որ ՔՊ-ի շատ պատգամավորներ դեռ հնարավորություն ունեն նահանջելու, կարող են միանալ իրենց, ինչի արդյունքում իրավիճակ կփոխվի: Կլինե՞ն ՔՊ-ականներ, որոնք կարող են միանալ այս ընդդիմությանը և կհեռանան ձեր թիմից: 

–Իշխան Սաղաթելյանն այս ընթացքում այնքան բաներ է խոսել այդ հարթակից, որ ես իր ոչ մի ասածին լուրջ չեմ վերաբերվում։ Նաև այն խոսքին, թե, իբր, պատրաստվում է հետևել վարչապետին: Երևի նա տեղյակ չէ, որ վարչապետի հետևից նախևառաջ գնում է իր քաղաքական թիմը, և այդ թիմի հետևից էլ գնացել է 687 հազար քաղաքացի: Այնպես որ, Իշխան Սաղաթելյանի բարբաջանքին դժվար կարողանամ պատասխանել: 

–Վստա՞հ եք, որ չի լինի իրավիճակ, երբ իշխանությունը կնահանջի, հրաժարական կտա: 

Ես բացառում եմ արտահերթ ընտրությունները այս պահին, քանի որ չեմ տեսնում դրա ոչ հանրային պահանջը, ոչ էլ օրակարգ, որի շուրջ կարող է նման պահանջ ձևավորվել: Ինչպես երկու շաբաթ առաջ էի ասում, որ ընդդիմությունը չունի ոչ մի ծրագիր, չնայած ամեն օր կրկնում են, թե ունեն, այնպես էլ հիմա եմ նույնը ասում այս երկու շաբաթն ապացուցել են, որ այս մարդիկ որևէ ծրագիր չեն ունեցել, չունեն և դժվար էլ ունենան: