Ինչ-որ պատճառ պիտի գտնեն, որ արդարացնեն իրենց անհաջողությունն ու գնան տուն․ Արփի Դավոյան

մայիսի 24, 2022

Հարցազրույց՝ «Քաղաքացիական պայմանագիր» խմբակցության պատգամավոր Արփի Դավոյանի հետ։

- Որպես իշխանության ներկայացուցիչ՝ ինչպե՞ս եք պատկերացնում ընդդիմության հանրահավաքների ու բողոքի ակցիաների շարունակությունը։ Դրանք չեն դադարում։

- Այնպես, ինչպես պատկերացնում են բոլորը, և ինչպես որ պետք է լինի՝ մարդիկ խելոք, սուսուփուս գնալու են իրենց տները, որովհետև ի վերջո հասկանալու են, որ ինչի համար դուրս էին եկել փողոց, ի սկզբանե անիմաստ էր։ Եվ հիմա ինչ-որ պատճառ պիտի գտնեն, որ արդարացնեն իրենց անհաջողությունն ու գնան տուն։

- Այսինքն, բացառո՞ւմ եք, որ վարչապետ Նիկոլ Փաշինյանը հրաժարական տա։

- Ոչ միայն հրաժարականի պահանջը, կարծում եմ, անգամ այդ հարցը տալն է անիմաստ։ Այդ պահանջն ընդամենը մի քանի հոգու ցանկությունն է, բայց սա պետություն է, ոչ թե մի քանի հոգու ցանկությամբ առաջնորդվող սահմանափակ պատասխանատվությամբ ընկերություն։

- Հնարավո՞ր է, դուք նրանց երկխոսության հրավիրեք, ինչպես առաջին նախագահ Լևոն Տեր-Պետրոսյանն էր կոչ արել՝ Ռոբերտ Քոչարյանը, Սերժ Սարգսյանն ու Նիկոլ Փաշինյանը միասին պետք է քննարկեն ու ստեղծված իրավիճակից դուրս գալու լուծում գտնեն։

- Երկխոսության համար քննարկում ծավալելու մասին որևէ խոսակցություն չկա և, կարծում եմ, չի էլ կարող լինել։ Տեսե՞լ եք, թե այդ մարդիկ փողոցում ինչպես են իրենց պահում։ Երկխոսում են քաղաքակիրթ մարդկանց հետ, ոչ թե նրանց, ովքեր հայհոյում են ու հայհոյախառն խոսքերով փողոցներում վազվզում։

- Ընդդիմության բացակայությունն Ազգային ժողովի գործունեության վրա բացասաբար չի՞ անդրադառնա։

- Այս ընդդիմությունն իր գալու օրվանից առանձնապես որևէ օգտակար գործողություն չի կատարել, և հիմա նրա բացակայությունը որևէ կերպ չի անդրադառնում ԱԺ աշխատանքների վրա։ Թեև շատ վատ է, որ ՀՀ ԱԺ-ն չունի առողջ ընդդիմություն։ Շատ լավ կլիներ, եթե մենք ունենայինք իրական ընդդիմություն։ Այդ մարդիկ ընդդիմություն չեն, նրանք ռևանշիստներ են։

- Առանց ընդդիմության մասնակցության՝ ընդունված օրենքների, որոշումների լեգիտիմության խնդիր չի՞ առաջանում։ Միայն իշխանությունն է մասնակցում քվեարկություններին, նախագծերի քննարկումները շատ կարճ են տևում, շատ հաճախ քննարկում չի էլ լինում։

- Ոչ, մեր ընդունած որոշումները լեգիտիմության խնդիր չունեն։ Իշխանությունը կատարում է իր պարտականությունը, մասնակցում նիստերին, իրականացնում օրենքով վերապահված իր գործառույթները։

- ԱԺ նախագահ Ալեն Սիմոնյանը հայտարարել է, թե շատ խիստ է լինելու ոչ հարգելի բացակայություններ ունեցող պատգամավորների նկատմամբ։ Մանդատներից զրկելու հա՞րց է դրվելու։

- Նման հարց կարող է քննարկվել։ Ինչպես հայտարարել է Ալեն Սիմոնյանը, մենք հետևելու ենք օրենքին և խիստ ենք վարվելու այն պատգամավորների հետ, որոնց բացակայությունները հարգելի չեն։

- Նախկին իշխանությունը՝ ՀՀԿ-ն էլ էր հայտարարում, որ շատ բացակայած պատգամավորները մանտատից կզրկվեն, բայց երբեք նման քայլի չգնացին։

- Չեմ կարող նախկին իշխանությունների այդ ոճը մեկնաբանել։ Այն ժամանակ իրենց ընկերներն էին բացակայում, ինչպե՞ս կարող էին նրանց մանդատից զրկել։ Բայց այստեղ ընդամենը օրենքի պահանջը կատարելու խնդիր կա։

- Իսկ ընդդիմությունը կվերադառնա՞ ԱԺ։

- Չեմ կարծում, որ ԱԺ չվերադառնալու տարբերակ ունենան։ Նրանք ասել էին, որ չեն վերադառնա, սակայն եկան կառավարության հարցուպատասխանին և դրժեցին իրենց խոստումը։ Իհարկե, շատ անփառունակ եկան և անփառունակ գնացին։ Ես կարծում եմ, որ այդ մարդիկ սկզբունքային չեն եթե ասել են, որ ԱԺ չեն վերադառնա, ուրեմն, չե՞ն վերադառնալու։ Վերադառնալու են, որովհետև իրենց համար խոսքը արժեք չունի։

- Աղվան Վարդանյանն ու ՀՅԴ ԳՄ ներկայացուցիչ Իշխան Սաղաթելյանը հայտարարել են, թե «շատ-շատերն այսօր ՔՊ-ում գերության մեջ են, նրանք սխալվել են։ ՔՊ-ական մի քանի պատգամավորներից զատ, մնացածը նահանջելու, պատասխանատվություն չկրելու ազատ տեղ ունեն»։ Այս առումով ինչպիսի՞ տրամադրություններ կան ձեր թիմում։

- Ձեր նշած անձանց այդ ու նրանց մյուս՝ համատիեզերական հանրահավաքներ, 50-60 հազարանոց երթեր ունենալու մասին հայտարարությունների միջև կարելի է հավասարություն դնել, դրանք նույն շարքից են և նույնքան են համապատասխանում իրականությանը։ Դա թվացյալ իրականություն է, որը կերազեին ունենալ, բայց որը երբեք իրականություն չի դառնա։ Նման լուրեր տարածելով՝ նրանք փորձում են իրենց մխիթարել։ Իհարկե, նման բան չկա։

- Բայց անցած տարի մի քանի պատգամավորներ դուրս եկան ձեր խմբակցությունից, ինչո՞ւ եք բացառում, որ նորից նման դեպքեր կլինեն։

- Ոչ, հիմա նման բան չի կարող լինել, դա ընդամենը Իշխան Սաղաթելյանի հերթական երազանքներից մեկն է։

- Հասարակական կազմակերպություններից հայտարարում են, որ եթե ապօրինի ծագում ունեցող գույքի բռնագանձման գործընթացի շրջանակում քննվող գործերով մեղադրվողները ՀՀ դատարաններում պարտվեն ու դիմեն ՄԻԵԴ, ապա այնտեղ էլ Հայաստանը կպարտվի, քանի օր գործող օրենսդրությունը շատ թերություններ ունի։ Ասում են, որ դուք չեք ընդունում դրանք շտկելու վերաբերյալ նրանց առաջարկությունները։ Դուք այդ օրենքում անցած շաբաթ կատարված փոփոխությունների նախագծի հարակից զեկուցողն էիք, ՀԿ-ների հետ նման հարցերը չե՞ք քննարկում։

- Ես նման քննարկում չեմ լսել, առաջարկությունների մասին էլ տեղյակ չեմ։

- Նրանք մտահոգություն ունեն, որ այդ գործերի քննության ժամկետը 2-ից 3 տարի դարձնելով՝ դուք պարզապես նպաստում եք խնդրի արագ լուծմանը։

- 3 տարվա համար մենք էլ ենք մտահոգություններ հայտնել, դատախազությունից մեզ վստահեցրել են, որ դա չի բերի գործերի քննության երկարեցմանը։ Նրանք ասում են՝ որոշ գործերի համար է երկար ժամանակ անհրաժեշտ, բայց մենք խորհրդարանական վերահսկողության գործիքներով օրենքի կիրառումը կպահենք մեր ուշադրության կենտրոնում և կհետևենք այդ փոփոխությունների արդյունավետությանը։

- Ձեզ քննադատում են, որ այս 4 տարում ապօրինի գույքի վերադարձի, կամ ինչպես Նիկոլ Փաշինյանն է ասում՝ թալանը կոպեկ առ կոպեկ վերադարձնելու ձեր խոստումը չեք կատարել։ Ասում են, որ 4 տարին ԱՄՆ նախագահների պաշտոնավարման մեկ ժամկետն է, մինչդեռ դուք չկարողացաք սայլը տեղից շարժել։

- Այդ հարցը խորհրդարանում մենք էլ ենք քննարկել, հայտնել մեր մտահոգությունները, հասարակությունը նույնպես այդ հարցը շատ է բարձրացնում։ Մենք այդ բոլոր խնդիրները փոխանցել ենք պատկան մարմիններին, և մեզ վստահեցրել են, որ իրենց վարույթները երկար են տևում, բայց դա որևէ կերպ չի նշանակում, որ գործընթացը տեղի չի ունենա։