Եթե խցանումները շատ են լինում, ժամանակը կանգ է առնում քաղաքում․ Էդգար Հակոբյան

մայիսի 25, 2022

Հարցազրույց «Քաղաքացիական պայմանագիր» խմբակցության պատգամավոր Էդգար Հակոբյանի հետ։

–Դուք Ազգային ժողովում եք այս տարվա հունվարիցի՞նչ ծրագրեր ունեք:

–Ես ամեն օր այցելություններ եմ կատարում պատերազմի հետևանքով վիրավորված զինծառայողներին կամ զոհված զինծառայողների հարազատներին, հանդիպումներ եմ ունենում մարզերում ու հատկապես Մալաթիա-Սեբաստիա վարչական շրջանի բնակչության հետ: Ես մինչև պատգամավոր լինելը Մալաթիա-Սեբաստիա վարչական շրջանում էի աշխատում ու համայնքի խնդիրներին շատ ծանոթ եմ: Բացի այդ, «Քաղաքացիական պայմանագիր» կուսակցության տարածքային կառույցի ղեկավարն եմ:

Իմ այցելությունները մարզեր հիմնականում կապված են ոռոգման ջրի խնդիրների հետ: Տարբեր ծրագրեր ունեմ: Մի խոսքով՝ զբաղվում եմ ինչով հասնում է:

Օրենսդրական նախաձեռնություններ էլ ունեմ, բայց դրանց մասին չեմ ուզում խոսել, ընթացքի մեջ են, երբ ստացվի, կասեմ։

–Գոնե կարո՞ղ եք ասել՝ որ ոլորտներին են առնչվում այդ նախաձեռնությունները:

–Ջրային կոմիտեի հետ են կապված դրանք:

–Հիմա խորհրդարանում միայն մեծամասնությունն է աշխատում, ընդդիմությունը այս օրերին փողոցում բողոքի ակցիաների միջոցով պահանջում է վարչապետի հրաժարականը: Ի՞նչ դիրքորոշում ունեք այս իրադարձությունների վերաբերյալ:

–Իմ դիրքորոշումն այն է, որ լավ կլինի՝ ամեն մարդ իր պարտականությունները կատարի, իր առջև դրված խնդիրները լուծի, մի խոսքով՝ իր գործը անի, զբաղվեն աշխատանքով: Չգիտեմ, ես անձամբ զբաղված եմ իմ աշխատանքով, անում եմ ամեն ինչ, որ մարդիկ գոհ լինեն: Այդքանն է իմ գնահատականը, ճիշտ չեմ համարում՝ այն քվեն, որ ժողովուրդը տվել է ընդդիմությանը և մեզ, նպատակին չծառայեցնել: Դա սխալ եմ համարում: Այդքանը կարող եմ ասել:

–Բայց ընդդիմությունն ասում է՝ այս քայլերով, գործողություններով փորձում են փրկել Արցախը: Այսինքն՝ իրենք էլ դա են համարում իրենց գործը:

–Գիտեք, շատ չեմ ուզում ծավալվել այդ թեմայով: Օրինակ՝ հարցրեք՝ ի՞նչ ծրագրեր ունեք, հարցրեք՝ ինչո՞վ ենք զբաղվում: Օրինակ՝ ես կարծում եմ, որ քաղաքական թեմաներից, ընդդիմության գործողություններից շատ խոսելով մենք մեր ժամանակը վատնում ենք: Ես կարծում եմ, որ այդ թեմաներով հարցազրույցներով մենք սպառում ենք մեր ժամանակը, ինչը վնասում է մնացած գործին:

Բոլորին խորհուրդ եմ տալիս ավելի շատ գործից խոսել, զբաղվել գործով և ոչ թե ուրիշ բաներով:

–Այսինքն, պարոն Հակոբյան, Դուք կարծում եք՝ նման ցույցերի կարիք չկա, ու պետք է աշխատե՞լ:

–Այո, իրենք էլ պետք է այդպես վարվեն: Մենք միշտ պատրաստ ենք եղել ընդդիմության հետ աշխատելու: Չգիտեմ: Մենք մեր գործն ենք անում ու ամեն ինչ անում ենք, որ լավ լինի: Մնացած հարցերով չեմ ուզում գնահատականներ տալ: Զգում եմ, որ այս պահին մեր երկիրը այն վիճակում էլ չէ, էլի, որ բողոքի գործողություններով, խցանումներով խնդիրներ առաջացնեն, ու, օրինակ, տուրիստները չգան մեր երկիր հանգստանալու: Ես կարծում եմ՝ այս ցույցերն ու գործողություններն ավելորդ են:

–2018-ին էլ Ձեր ներկայացրած ուժն էր նման ճանապարհով պահանջում այն ժամանակ գործող իշխանությունների հրաժարականը: Այն ժամանակ անտեղի չէր, հիմա անտեղի՞ է:

–Էլի ուզում եք, որ քաղաքական թեմաներից խոսեմ, բայց ես չէի ուզի: Լավ կլինի՝ առաջիկայում կատարվելիք ծրագրերից խոսենք:

–Շատ լավ, ասացիք՝ շփվում եք բնակչության հետ, գույքագրե՞լ եք՝ ինչ խնդիրներ ունեն մարդիկ, լուծումներ տրվո՞ւմ են դրանց:

–Ամեն տեղ էլ մարդիկ ունեն խնդիրներ: Դրանք մենք հավաքագրում ենք ու համայնքների հետ համագործակցության արդյունքում փորձում ենք լուծում տալ: Ինչ հնարավոր է, բնակչության համար անում ենք:

–Իսկ այդ հանդիպումների արդյունքում ի՞նչ եք եզրակացրել՝ Ձեր ներկայացրած քաղաքական ուժը ունի՞ հանրային աջակցություն, արդյո՞ք զգում եք իշխանության նկատմամբ վերաբերմունքի փոփոխություն:

–Եթե փոխվել է, ապա միայն դրական: Ես վստահ եմ: Այդքանը կարող եմ ասել: Այո, հանրային աջակցությունը մեր ուժն է: Դա, կարծում եմ, բոլորին է տեսանելի, որովհետև ընտրություններից մեկ տարի էլ չի անցել: Եթե ժողովրդի աջակցությունը չլիներ, ուղղակի չէին ընտրի: Ես սխալ եմ համարում այն, որ ընտրություններից դեռ մեկ տարի չանցած՝ ընդդիմությունը դժգոհություն է հայտնում: Մարդիկ աջակցում են մեզ ու դեմ չեն մեր կառավարությանը:

–Իսկ այդ դեպքում, փողոցում ովքե՞ր են կանգնում ու պահանջում հրաժարական:

–Ես չգիտեմ: Հիմնականում՝ չեմ ճանաչում:

–Դուք նույնպե՞ս, ինչպես Ձեր գործընկերները, կարծում եք, որ նախկին իշխանության ներկայացուցիչները չեն կարող գալ իշխանության:

–Նախկին իշխանությունը այժմ ունի պատգամավորական մանդատներ, և ես կարծում եմ, որ նրանք հնարավորություն ունեն դրանք օգտագործել ժողովրդի բարօրության և բարեկեցության համար: Չեմ ուզում գնահատականներ տալ, բայց ժողովուրդը իր գնահատականը տալիս է: Ամեն ինչ ակնհայտ է:

–Այսինքն, վստահ եք՝ իրենց ուզած հեղափոխությունը չի լինի:

–Հարգելիս, ես անընդհատ ասում եմ՝ եկեք գործերից, ծրագրերից խոսենք, բայց Դուք տանում եք դեպի քաղաքականություն: Այսօր մեր ժողովուրդը կարիք ունի լրագրողների, հարցազրույցների միջոցով իմանան՝ ինչ ծրագրեր կան, ինչ է արվում:

–Ես Ձեզ հարցրի՝ ինչ օրենսդրական նախաձեռնություններ,՝ ի՞նչ ծրագրեր ունեք՝ ասացիք հիմա չեք կարող ասել: Շատ լավ, ինչպես կուզեք: Դուք ԱԺ ֆինանսավարկային և բյուջետային հարցերի հանձնաժողովի անդամ եք, ինչպե՞ս եք գնահատում երկրի տնտեսական վիճակը: Հանրությունը դժգոհում գնաճի բարձր տեմպերից, որին զուգահեռ թոշակներ, աշխատավարձեր չեն բարձրանում:

–Եթե տեղյակ եք, տարածաշրջանում ու ամբողջ աշխարհում գնաճի տեմպերի առումով բավականին լավ դիրքերում ենք: Գնաճը մեր երկրում, մյուս երկրների համեմատ, ցածր է: Պետք է նկատի ունենալ, որ նախ կորոնավիրուսը, հետո պատերազմը մեր երկրում տնտեսական խնդիրներ առաջացրեցին, բայց որ այդ ամենի հետ մեկտեղ՝ գնաճը մեր երկրում ցածր է, իրավիճակը դրական է: Դա կառավարության վարած տնտեսական քաղաքականության ու իրականացված բոլոր տեսակի միջոցառումների արդյունքն է: Ճիշտ ծրագրերի շնորհիվ մեր տնտեսությունը դրական միտումներ արձանագրեց:

–Դուք ի՞նչ սպասումներունեք, ինչպե՞ս կավարտենք տարին: Տնտեսական ցուցանիշների աճ սպասո՞ւմ եք:

–Ես, ճիշտն ասած, չեմ ուզի կանխատեսումներ անել: Բայց ամեն տարի էլ որոշակի չափով տնտեսական աճ ունենում ենք:

–Ո՞ր ոլորտներում եք աճ կանխատեսում: Օրինակ՝ մասնագետներն ասում են, որ արտահանման հարցում գործարարները հիմա խնդիրներ ունեն:

–Տարբեր ոլորնտերում տարբեր տեսակի զարգացումներ են լինում: Իսկ ընդհանուր առմամբ, մեր երկրի տնտեսությունը կայուն վիճակում է: Պատերազմից (նկատի ունի ռուս-ուկրաինական պատերազմը-հեղ.) հետո շատ երկրներում խնդիրներ ծագեցին, և Հայաստանում էլ ինչ-որ չափով խնդիրներ եղան՝ թանկացումների և այլ առումներով: Բայց ամեն դեպքում, մեր կառավարության գործընկերների ջանքերի շնորհիվ է, որ ճգնաժամային իրավիճակ չէ: Ամեն ինչ արվում է, որ լավ լինի:

–Օրինակ՝ երկրում քաղաքական անկայունությունը կարո՞ղ է երկրի տնտեսության նկատմամբ անվստահության մթնոլորտ առաջացնել և, ասենք, ներդրումներ չկատարվեն:

–Չեմ կարծում: Ես կարծում եմ՝ խցանումները կարող են ինչ-որ չափով ազդել տնտեսության վրա:

–Օրինակ՝ էկոնոմիկայի նախարարն ասում էր, որ քաղաքում խցանումները տնտեսական աճի ցուցիչ են:

–Ծանոթ չեմ՝ ինչ հայտարարություն է արել նախարարը: Բայց ես կարող եմ ասել, որ եթե խցանումները շատ են լինում, կարելի է ասել, որ ժամանակը կանգ է առնում քաղաքում: Բոլոր տնտեսագետները գիտեն, որ խցանումները բոլոր երկրներում կարող են ազդել տնտեսության վրա:

–Բացասաբա՞ր:

–Հա, իհարկե: