Հարցազրույց ԱԺ պատգամավոր Սերգեյ Բագրատյանի հետ։ 

-Պարո՛ն Բագրատյան, Դուք վերջնականապես կողմոնորշվեցիք և «Քաղաքացիական պայմանագիր» կուսակցության ընտրացուցակում 52-րդն եք: Ինչպե՞ս ստացվեց, ինչո՞ւ այդպես որոշեցիք:

-Կողմնորոշվելու խնդիր չկա, բոլորս պայքարում ենք, որ մեր հայրենիքում արդարություն հաստատվի: Երեսուն տարի պայքարել ենք այդ արդարության համար: Եվ երբ գտնվել է քաղաքական ուժ, որը այդ արժեհամակարգը կրողն է, որը փորձում է արդարություն հաստատել Հայաստանում, բնականաբար, ողջամիտ մարդիկ պետք է աջակցեն այդ քաղաքական ուժին: Այդ թվում՝ ես:

-Արդարություն հաստատելու համա՞ր եք ընդգրկվել այդ ցուցակում:

-Միանշանակ:

-Ի՞նչն է խանգարել, որ երեսուն տարի արդարություն չի եղել:

-Արդարություն չի եղել, որովհետև ի սկզբանե կլանային համակարգի հիմքեր են դրվել, եղել ենք մի արժեհամակարգում, որտեղ ամենակարևորը փողն էր, ամենագլխավորը եղել են հովանավորչությունը, ազգակցական կապերը, բայց ոչ երբեք պետականությունը, երկրի ու քաղաքացու շահերը:

-Կներեք, պարո՛ն Բագրատյան, Ձեզ անվանում են ճամբարափոխ գործիչ՝ «Բարգավաճ Հայաստան»-ից՝ իշխող «Քաղաքացիական պայմանագիր» կուսակցություն: Ինչպե՞ս եք մեկնաբանում Ձեզ ուղղված այդ որակումները:

-Եթե արձանագրում ենք, որ քաղաքականության մեջ արժեհամակարգերը վերաձևակերպելու խնդիր կա, ուրեմն, չպետք է նայել կուսակցություններին: Քաղաքական ուժերը ժամանակավոր են, պետականությունն ու երկիրը՝ հավերժ: Քաղաքական ուժերը միջոց են՝ հասնելու պետականության հզորացմանը:

Այդ իմաստով ինձ համար առնվազն անլուրջ են նման խոսակցությունները, որովհետև բոլոր քաղաքակիրթ երկրներում վաղուց վերացել է քաղաքական ճամբար հասկացությունը: Դրանք ավելի շուտ ինձ հիշեցնում են մանկության տարիների ճամբարները: Այսինքն՝ դրանք այլևս քաղաքական լուրջ իմաստ չեն կարող պարունակել: Մեր հայացքը պետք է ուղղված լինի պետականությանը:

-Այսինքն, ճամբարափոխ չե՞ք:

-Եթե կուսակցությունը ճամբար է, ասենք՝ համակենտրոնացման ճամբար, ուրեմն, ճամբարափոխ եմ՝ համակենտրոնացման ճամբարից ընդհանրապես կամ խուսափում են, կամ փախուստի են դիմում:

-Գործնականում ինչպե՞ս ստացվեց Ձեր՝ ՔՊ ցուցակում ընդգրկվելը, Ձեզ առաջարկեցի՞ն, թե Դուք ինքնառաջադրվեցիք:

-Ես ցանկանում եմ, որ Դուք վեր կանգնեք այդ քաղաքական մանր խնդիրներից, այդ ոչ լուրջ ակցենտից և կարևորեք երկրի, պետականության գաղափարները:

-Սոցիալական ցանցերում քննարկում են, թե ինչպես ԲՀԿ-ի, այնպես էլ ՔՊ-ի դեպքում ղազագիր եք գրել: Եղե՞լ է այդպիսի բան:

-Ես ստիպված եմ Ձեզ կրկնել՝ սա արժեհամակարգային խնդիր է: Այսինքն, այս արժեհամակարգը ես գենետիկորեն կրում եմ: Արդարությունը, մարդկանց նկատմամբ բռնություն չգործադրելը, մոնոպոլիաներ չձևավորելը. սրանք արժեհամակարգային հատկություններ են, որոնք իմն են: Մնացած բոլոր արատավոր երևույթները, օրինակ՝ կոռուպցիոն, իմ թիրախներն են, և ես պայքարում եմ դրանց դեմ:

Եթե այսօր կա որևէ քաղաքական ուժ, որն այդ միսիան իրականացնում է, դա «Քաղաքացիական պայմանագիր» կուսակցությունն է: Ես միացել եմ նրանց՝ բոլոր խնդիրները լուծելու համար:

-Ասում եք՝ արդարության հաստատելու համար եք իշխող ուժին միացել: Մի փոքր պարզաբանեք՝ ի՞նչն է անարդար եղել հայաստանցիների կյանքում:

-Պետք է նկատած լինեք ընտրակեղծիքների, ստրկական պարտադրանքների, մարդկանց ճնշելու, կամազուրկ քաղաքացի ձևավորելու, համատարած թալանի, կոռուպցիայի, աղքատության մեջ վեր բարձրացող ու տասնյակ միլիոնավոր դոլար արժեցող դղյակների գոյությունը: Այս ամենը խոսում են այն մասին, որ մեր կյանքում անհավասարության, անարդարության, կոռուպցիայի և այլ բացասական երևույթների առկայության մասին:

-Դուք երկար տարիներ եղել եք ներկայացուցիչը այն ուժի, որի ղեկավարը Ձեր խոսքով՝ մի հսկայական դղյակ ունի. Ձեզ մոտ հարցեր չեն առաջացել այդ ժամանակ:

-2007-ին, երբ ես անդամակցել եմ այդ ուժին (նկատի ունի «Բարգաաճ Հայաստան» կուսակցությանը-հեղ.), Հայաստանում անարդարության դեմ պայքարելու միջոց չկար, բացի մեկ քաղաքական միավորից, որը գոնե համարժեք հնարավորություններ ուներ պայքարելու:

Նման հնարավորություն ուներ նորաստեղծ «Բարգավաճ Հայաստան» կուսակցությունը, որին ես անդամագրվեցի այդ ռեսուրսը օգտագործելով՝ գործող իշխանության անարդարությունների դեմ պայքարելու համար:

2018-ին, երբ հեղափոխություն եղավ, ավարտվեց այն հնարավորությունը, որը ես դիտարկում էի որպես նախորդ իշխանության դեմ պայքարի միջոց: Խնդիրն ավարտվեց և, բնականաբար, ես հաջորդ քայլը կատարեցի՝ աջակցելու այն քաղաքական ուժին, որն այդ արդարությունը հաստատելու է: Դա պետք է շարունակական դառնա:

-Իշխանության արմատական ընդդիմախոսները «Քաղաքացիական պայմանագիր» կուսակցությանը և Նիկոլ Փաշինյանին համարում են դավաճան: ԲՀԿ-ն, որին անդամակցում էիք, նույն որակում էր տալիս Փաշինյանին: ՔՊ-ին միանալիս մտավախություն չե՞ք ունեցել, որ Դուք էլ այդ որակումը կստանաք:

-Ոչ, ես մտավախություն չեմ ունեցել: Որակում տվողները համար մեկ դավաճաններն են, ինչո՞ւ պետք է նրանց ասածը հիմք ընդունեմ և դեռ մի բան էլ՝ մտավախություն ունենամ: Եթե այս երկրում պայքար կա արդարության համար, ապա դա անում է գործող իշխանությունը: Նախորդ բոլոր ուժերը միայն զբաղվել են թալանով, կոռոպցիայով, ստրկացնելով, մարդկանց կամքը ճզմելով և անօրինականություններով:

2018 թվականից հետո հույս կա, որ մենք կարող ենք երկիրը դնել դեմոկրատական ընթացքի մեջ: Ձեր նշած ուժերը ամեն ինչ անելու են, ամեն ինչ խոսելու են, որ խանգարեն այդ ընթացքը: Վստահեցնում եմ, որ ժողովրդի հավաքական իմաստնությունը հունիսի 20-ին հաղթանակելու է և ձեր նշած ուժերը հայտնվելու են քաղաքական աղբանոցում:

-Այդ թվում «Բարգավաճ Հայաստա՞նը»:

-Այդ թվում՝ ով ուզում է լինի: Ովքեր կպայքարեն այս գաղափարների դեմ, կհայտնվեն քաղաքական աղբանոցում: