Հարցազրույց` ԱԺ «Քաղաքացիական պայմանագիր» խմբակցության պատգամավոր Վաղարշակ Հակոբյանի հետ:

–Զորամասի կացարանի ողբերգական դեպքից օրեր են անցել, բայց չկա պաշտպանության նախարարի հրաժարականը, ինչի մասին խոսում են ընդդիմադիրները, ինչը պահանջում են սոցհարթակներում։ Նույնիսկ կառավարության հրաժարականի պահանջ է հնչում։ ՔՊ–ի ներսում հրաժարականի հարց քննարկվո՞ւմ է։

–Ես ցավակցում եմ զոհերի ծնողներին, հարազատներին, սա իսկապես մեծ կորուստ է: Բայց հիշեցնեմ, որ պաշտոնանկություններ եղել են: Կորպուսի հրամանատարից մինչև տարբեր տրամաչափի պաշտոնյաներ հրաժարական են տվել: Մենք իրավունք չունենք ընդհանրապես անմեղության կանխավարկածը խախտելու և սեփական էմոցիոնալ ֆոնին դատավճիռ կայացնելու: Պետք է գնա օբյեկտիվ քննություն, մեղավորները խստագույնս պատժվեն, և արվի ամեն ինչ, որպեսզի այլևս նման դեպքեր չկրկնվեն: Որոշ շրջանակներ իրենց գնահատականներով փորձում են խոչընդոտել նաև օբյեկտիվ քննության ընթացքն ու իրավապահ մարմինների աշխատանքը։ Երկրորդ կարծիք լինել չի կարող․ բոլորը, ովքեր գործառութային և պատասխանատվության առումով մեղավոր են այս աղետի մեջ, կրելու են այդ պատասխանատվությունը։ 

–Այսինքն, պաշտոնանկության պահանջը հնչում է ավելի շատ թիմին հարված հասցնելո՞ւ համար: 

–Պետք է կոնկրետ դեպքերին արձագանքենք: Ես չեմ ուզում, որ մենք որևէ կոնկրետ անձի վրա բարդենք ամեն ինչ: Պետք է հասկանանք բոլոր պատասխանատուների շրջանակը և նրանց օրենքի ողջ խստությամբ պատժենք: Բայց նաև շատ կարևոր է, որ որևէ մեկը չդառնա քավության նոխազ, և որևէ մեկն իր չկատարած աշխատանքը չբարդի այլ մարդու վրա: Սա ամենակարևոր բանն է: 

–Շատերը պահանջում են, որ պաշտպանության նախարարը պարզաբանի, թե ինչու են մեր զինվորները ծառայություն անցկացնում նման պայմաններում: Ունե՞ք այս հարցի պատասխանը։

–Որպեսզի կոնկրետ գնահատական տրվի, պետք է սպասենք օբյեկտիվ քննությանը, բայց ուզում եմ վստահեցնել, որ պաշտպանական գերատեսչության ղեկավարը արել ու անում է ամեն ինչ, որպեսզի բանակում բոլոր արատավոր երևույթները վերացվեն: Խոսքը միայն Սուրեն Պապիկյանի մասին չէ, մեր քաղաքական թիմը՝ վարչապետի գլխավորությամբ, անում է ամեն ինչ, որպեսզի բանակում օր առաջ պայմանները բարելավվեն:

–Դեպքի հետ կապված պաշտոնական վարկածի և որոշ ականատեսների պատմածի միջև հակասություններ են նկատվում։ Դասակի հրամանատարն ասել է, որ բենզին չի եղել, զինդատախազը հայտարարում է, թե դեռ պետք է պարզվի, թե տարաներում ինչ հեղուկ է եղել: Արժանահավատ համարո՞ւմ եք պաշտոնական տեսակետը:

–Ես խորհուրդ չեմ տալիս մասնագիտական եզրահանգումներ անել, հատկապես որ խորապես չենք տիրապետում իրավիճակին: Ես չեմ եղել տեղում, քննչական գործողությունների չեմ մասնակցել, չեմ կատարել այնպիսի աշխատանք, որ կարողանամ իրավաբանորեն փաստարկված քրեական գործընթացին վերաբերող գնահատականներ տալ: Այս համատեքստում եմ ուզում, որ հարցը դիտարկենք: Ես չեմ կարող ասել, թե որ վարկածն է իրականությանը համապատասխանում: Ես չգիտեմ՝ իրականում ինչ է կատարվել, դրա համար պետք է սպասենք պրոցեսի ավարտին: 

–Այս իրավիճակը ցույց չի՞ տալիս, որ բանակում լրջագույն խնդիրներ ունենք, ամենաթողություն է:

– 2022-ի սեպտեմբերյան մարտերին մեր հերոս զինվորները, ՊՆ ենթակայության տակ գործող սպաներն ու զինվորները, գեներալները, հրամանատարները հերոսաբար կանգնեցրին թշնամու հարձակումը: Մենք ցավալի կորուստներ ունեցանք, բայց կարողացանք մեր սուվերենությունը պաշտպանել: Ինչքան էլ չնկատելու տանք, բանակում բարեփոխումներ են տեղի ունենում: Ընթացքը գուցե դանդաղ է, գուցե չենք հասել ցանկալի մակարդակին, բայց հստակ ունենք մեր հերոս զինվորների ցույց տված արդյունքը: Հիմա ես հարց տամ՝ բանակում ամենաթողությո՞ւն է, թե՞ ոչ: Ես համաձայն չեմ Ձեր գնահատականների հետ՝ հաշվի առնելով այն փաստերը, որ նշեցի: 

–21-րդ դարում, փաստորեն, նորմա՞լ է վառարանով զորամաս կամ շինություն տաքացնելը։ 

–Ես ռազմական փորձագետ չեմ, չեմ կարող օբյեկտիվ գնահատական տալ, թե որ դիրքի որ հատվածում, որ աստիճանի վրա է ճիշտ վառարան ունենալը, և ընդհանրապես, դա հնարավոր է, թե ոչ: Ես չեմ կարող գնահատականներ հայտնել ՊՆ ենթակայության ներքո գտնվող սպաների ու զինվորների օգտագործած փամփուշտների վերաբերյալ, որովհետև ես դրա մասնագետը չեմ: Իսկ եթե խոսում ենք արդարության մասին, ասեմ, որ նորմալ կլինի, որ Հայաստանի զինվորը 21-րդ դարում ունենա ամենաժամանակակից սպառազինությունն ու հագուստը: Նա պետք է ունենա ամենաբարձր աշխատավարձը, որը կա զինված ուժերում աշխարհի մակարդակով: Բայց սա կարո՞ղ է իրականություն դառնալ վաղը, իհարկե, չի կարող: Մենք անո՞ւմ ենք ամեն ինչ անել, որ այդպես լինի: Այո, փորձում ենք անել: Այսօր այդ վիճակը չէ, որ գնահատենք, թե ինչ է եղել, ոնց է եղել: 

–Հայաստանը խորհրդարանական երկիր է, չպե՞տք է խորհրդարանը լսումներ աներ, ԱԺ կանչեր նախարարին, վարչապետին, պարզաբանումներ պահանջեր։

–Եթե խորհրդարանն այստեղ ունի դերակատարում, վստահեցնում եմ, որ դա կիրականացնի: ԱԺ-ում գոյություն ունի համապատասխան պրոֆիլային հանձնաժողով: Ես առաջարկում եմ սպասել, և այս դեպքում էլ գնահատական չտանք: Մարդիկ, միգուցե, գործունեություն են կազմակերպում նաև ձեր ներկայացրած տրամաբանության շրջանակում։ 

–Կարծում եք՝ պաշտոնանկությունների հարցի քննարկելու կարի՞ք անգամ չկա: 

–Ես նման բան չեմ ասել, և չեմ ասել հակառակը: Սպասենք, և օբյեկտիվ քննության արդյունքում պատասխանատվության ենթարկվեն նրանք, որոնք թույլ են տվել, որ այս իրավիճակը ստեղծվի: 

—Այս ամենի պատասխանատուն պաշտպանական գերատեսչության ղեկավարը չէ՞: 

–Պաշտոնյաները, որոնք թույլ են տվել, որ այս իրավիճակը ստեղծվի, պետք է պատժվեն: Այսօր մենք ունենք պաշտպանության նախարար, որը մեր քաղաքական թիմի անդամ է, և նա ամեն ինչ անում է, որ օր առաջ բանակում լինեն բարեփոխումներ: Պետք է զերծ մնանք ոչ օբյեկտիվ գնահատականներից:

–Մենք տեսել ենք բազմաթիվ գործեր, որոնք չեն բացահայտվել: Ի՞նչ երաշխիք, որ այս գործը բացահայտվելու է:

–Երաշխիքները պետք է իրավապահ մարմիններից ճշտեք: Ես այդ համակարգի ներկայացուցիչ չեմ, բայց որպես քաղաքական համակարգի ներկայացուցիչ, ուզում եմ վստահեցնել, որ այլ տարբերակ չի կարող լինել: 

–Իշխող ուժի ներսում քննարկվում են հաճախ հնչող գնահատականները, որ այս 4 տարում երկրի կառավարումը ձախողվել է, հեղափոխության խոստումները չեն իրականացել, բանակում բարձիթողի վիճակ է, և այս թիմը պետք է հեռանա։ 

–Իշխանությունը ձևավորվում է և հեռանում է բացառապես ՀՀ քաղաքացու քվեով: Մեր քաղաքացիները իրենց քվեով որոշում են կայացրել, որ «Քաղաքացիական պայմանագիր» կուսակցությունը պետք է լինի մեծամասնություն, Նիկոլ Փաշինյանը պետք է լինի վարչապետ, և վարչապետն էլ որոշել է, թե ովքեր պետք է լինեն կառավարության կազմում: Քաղաքացու գնահատականն ամենակարևորն է: ՀՀ քաղաքացու անձնագիր ունեցող ցանկացած մարդու գնահատական մեզ համար ամենակարևորն է: Բայց դա լինում է և լինելու է բացառապես ընտրությունների միջոցով: 

–Այսինքն, եթե նույնիսկ իշխող ուժը ձախողվել է, էլի պետք է կառավարի՞։

–Դրա գնահատականը չեք կարող տալ Դուք կամ ես: Դուք կարող եք մտածել, որ քաղաքական թիմը ձախողել է, ես կարող եմ մտածել հակառակը, բայց դրանից էությունը չի փոխվում: Մենք պետք է ընտրությունների միջոցով ձևավորենք իշխանություն: Այս էջը հիմնովին փակված է, այլ տարբերակ չի լինելու երբեք, միշտ ՀՀ-ում լինելու են ընտրություններ և ընտրությունների միջոցով քաղաքական ուժերի իշխանության գալու կամ իշխանությունից հեռանալու պրոցես: Ինչքան էլ ֆոնը էմոցիոնալ ու ցավալի է, բայց այդ երկու իրավիճակները միավորելը սխալ է: Ես այստեղ էլ եմ տեսնում, որ քաղաքական բաներ կան, բայց մենք սովոր ենք դրան: